HARAWI

PUMA

Phuyuq wawan oqe michi 

phiña uywa rumi maki

orqollantas purishanki

rit´illantas k´umu k´umu

Phiña phiña qhawayniykiwan

phuyutaraq picharinki

chupaykita maywirispa

orqotaraq mayt´urinki

Ch´awar kiska sunkhaykiwan

Intitaraq, llaqllachinki

Qalluykitaq sansaq puka

Yawartana llaqwarishan.

Apukunaq sumaq uywan

Inkakunaq yupaychanan

Yarqasqachu purishanki

Aychatachu maskhashanki.

Hamuy, noqa qarasqayki

Kay sonqoyta qharispa

Qhasqoypatapi thallaykuy

Llalliykunata ñit´iykuy

Qaqa hasp´iq silluykiwan

Hank´uykunata watariy

Hinaspataq puñuchiway

Ama llaki muchunaypaq.